வல்லமை மிக்க தேசம் – தேன்மொழிதாஸ்

0



தீர்மானமில்லாத கேள்வியாக
பூக்கள் மலருகின்றன

வினோத மூச்சின் அறைகளையே உடலாகக் கொண்ட
அல்லிக் கொடிகளைத் தீண்டும் போது
மந்திரமிக்க சொல்
நீரிலிருந்து பிறப்பதை படித்திருக்கிறேன்

நித்தியத்துவமான வழக்காடும் சொற்களை இப்படித்தான் படைத்தேன்

தயக்கமின்றி சொல்லப்படும் பெண்ணின் காதல் வெற்றி வில்லாக நிலவின் பிறையை உராய்ந்து செல்வதில்லை
ஆணின் விசை உயிர்த்தலில் பாயும்

சகுனசாத்திரத்தில் திசைவழிக் குறிப்புகள் அதிகம் புலம்புவது எல்லோருக்குமானதல்ல

ஒருகாலத்தில் புத்துணர்ச்சியை அருந்திப் பெற்ற நாம்
மற்றொரு காலத்தில்
நிலத்தில் கால் வைக்கையில் பெறுவோம்

சுத்தத்தை உச்சரிப்பது தூசிகள் தானே

ஒன்றை அழித்து மற்றொன்றை பெறுதல் தான் நிகழ்காலம்

அழிவு வர்ணிக்க ஏதுவாக வளையும்
ஆயினும் அத்தியாயங்களை நுண்மையாக உதிர்க்கும்
நிலைமொழிகளை ஈன்றெடுக்கும்

உண்மை நிரம்பிய கண்களின் வழியாகவே வல்லமைமிக்க தேசம் கட்டியெழுப்பப்படும்

உறுதி கொண்ட எதுவும் வேற்றுக் கிரகத்தின் கருமையத்தையும் கடக்கும்

சாதாரணமான காலங்கள் தான் வரலாறுகளாகவும் விரிவுபெறும்
கூர்ந்து நோக்கினால் ஊடே
நீதியோ அநீதியோ கவனமாக ஓடிக்கொண்டிருக்கும்

ஏதேனும் ஒரு பக்கத்தில் ரத்தத்தால் மடித்து வைக்கப்பட்ட வரிவடிவெழுத்து
மற்றொரு காலத்தின் புரட்சியாகும்

எனது தேசத்தை விரும்பும் அளவுக்கு அதன் பெயரை விரும்பவிலை
இந்தியா என்பதில் ஒரு அநீதி ஒட்டிக்கொண்டிருக்கிறது
மேலும் விநோத வெப்பத்தை மடல்களாகக் கொண்ட தாமரையை
வணங்க மக்களைக் கட்டாயப்படுத்துகிறது

Leave A Reply

Your email address will not be published.